Go back to search results

Mae Canolfan Adnoddau Bryntirion wedi'i lleoli ar gyrion tref farchnad fach Tregaron, ardal o brydferthwch rhagorol, yng nghalon gorllewin Cymru. Mae'r cartref preswyl wedi'i leoli o fewn pellter agos i siopau, swyddfa bost, caffis, bwytai ac amwynderau eraill. Mae gwasanaeth bws bob dwy awr i drefi cyfagos Llanbedr Pont Steffan ac Aberystwyth sy'n weithredol am chwe diwrnod yr wythnos. Mae'r cartref yn gartref preswyl 15 gwely sy'n darparu llety dros ddau lawr. Ar yr ail lawr, mae yno bedair ystafell wely. Mae deg ystafell wely ar y llawr gwaelod, gydag un o’r ystafelloedd yn un dwbl sy'n addas ar gyfer cyplau os bydd angen. Rydym yn darparu lleoliadau preswyl yn y tymor byr, dros dro ac yn barhaol, ac mae gennym un gwely seibiant sy’n cael ei ddefnyddio'n dda. Mae gan Bryntirion ganolfan ddydd sydd wedi'i lleoli yn yr un adeilad â'r cartref preswyl ac sydd â chapasiti ar gyfer hyd at 16 o breswylwyr, er y gall hyn amrywio yn dibynnu ar eu haciwtedd. Mae'r cartref yn gweithio'n agos gyda’r meddygon teulu, nyrsys ardal, ffisiotherapydd, therapyddion galwedigaethol a nyrsys arbenigol o'r bwrdd iechyd lleol, y gallwn gysylltu â hwy am gymorth a chyngor ar unrhyw adeg. Mae pob un o'n preswylwyr wedi'i gofrestru â meddyg teulu a chynigir gwasanaethau optegydd, podiatrydd/ciropodydd a deintydd iddynt hefyd. Mae darparu amgylchedd sy'n ddwyieithog ac â ffocws diwylliannol o ran anghenion y preswylwyr yn allweddol i'r cartref. Mae'r holl breswylwyr, teuluoedd a gofalwyr yn cael eu hannog i gymryd rhan wrth ddatblygu eu llyfr cofio eu hunain am eu bywyd. Rydym yn gweithio ar ddull sy'n canolbwyntio ar yr unigolyn, gan archwilio gweithgareddau sy'n diwallu anghenion a chwrdd â diddordebau pob preswylydd.